Літовец спрабаваў трапіць у Беларусь па пашпарце сябра. Выявілася, гэта псеўдамільянер, якога ў Літве абвінавачваюць у махлярстве
Беларускія памежнікі 29 снежня затрымалі літоўца, які спрабаваў трапіць у краіну па чужым пашпарце. Мяркуецца, што ён хацеў збегчы з-пад падпіскі аб нявыездзе.
Мужчыну затрымалі ў пункце пропуску «Каменны Лог». Ён ехаў у Беларусь на аўтобусе «Вільня — Мінск» і прад'явіў беларускім памежнікам чужы пашпарт. Мужчына патлумачыў, што не мог выехаць з Літвы па сваіх дакументах, таму пазычыў пашпарт у сябра.
Літоўца затрымалі і накіравалі ў ІЧУ, яму пагражае штраф да 100 базавых адзінак і дэпартацыя па адміністрацыйнай справе, а таксама да 2 гадоў «хіміі» па крымінальнай справе.
Як піша Delfi, мужчыну зваць Ігнас Ёмантас. На радзіме яго падазраюць у буйным махлярстве і іншых злачынствах. Ігнасу прызначана некалькі мер стрымання, уключаючы забарону на выезд з краіны.
У літоўскай пракуратуры пацвердзілі затрыманне грамадзяніна Літвы, які парушыў меру стрымання і спрабаваў з'ехаць у Беларусь. Аднак яго імя называць не сталі. Служба аховы мяжы Літвы правярае інфармацыю, а адвакат Ёмантаса нічога не ведае пра яго затрыманне.
МЗС Літвы паабяцаў аказаць затрыманаму кансульскую дапамогу і яшчэ раз заклікаў літоўцаў не ездзіць у Беларусь, а тым, хто знаходзіцца ў краіне, пакінуць яе.
Ёмантас называе сябе мільянерам. Паводле літоўскай прэсы, ён лічыцца лідарам злачыннай групоўкі, якая займалася махлярствам у сферы будаўніцтва, ухілялася ад падаткаў і нанесла шкоду дзяржаве ў памеры 1,2 млн еўра. Па справе праходзяць восем падазраваных, якім інкрымінуюць пяць крымінальных артыкулаў, уключаючы адмыванне грошай.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа29
Каментары