Сеул не будзе супраціўляцца амерыканскім тарыфам праз «гістарычны доўг» Карэі перад ЗША

На фоне новых 25-працэнтных тарыфаў, уведзеных адміністрацыяй Дональда Трампа супраць карэйскіх тавараў, у тым ліку аўтамабіляў і мікрачыпаў, выконваючы абавязкі прэзідэнта Паўднёвай Карэі Хан Дак Су заявіў: «Роля ЗША была вырашальнай у тым, што Карэя стала такой, якой яна ёсць сёння».

Ён падкрэсліў, што пасля Карэйскай вайны ЗША далі краіне дапамогу, інвестыцыі, тэхналогіі і гарантыі бяспекі, што зрабіла Карэю прывабнай для замежных укладанняў.

«Мы не будзем успрымаць дзеянні ЗША як нешта, супраць чаго трэба бараніцца. Мы шукаем выйгрышныя рашэнні для абодвух бакоў», — заявіў Хан напярэдадні перамоваў з Трампам.

Нягледзячы на тое, што паміж краінамі існуе дамова аб свабодным гандлі, Паўднёвая Карэя сутыкнулася з шэрагам новых абмежаванняў з боку ЗША. У той жа час Хан заявіў пра гатоўнасць скарачаць гандлёвы лішак (ён склаў рэкордныя $55 млрд у 2024 годзе) і разгледзець зніжэнне нетарыфных бар’ераў — напрыклад, у сферы аўтамабільных выкідаў, цэнаўтварэння на лекі і імпарту амерыканскай ялавічыны.

Ён таксама выказаў гатоўнасць абмеркаваць павышэнне супрацоўніцтва ў будаўніцтве ваенных караблёў і закупы амерыканскага ЗПГ і самалётаў.

Трамп жа адкрыта звязвае гандаль з бяспекай і заклікае Сеул больш аплачваць прысутнасць амаль 28 500 амерыканскіх вайскоўцаў на паўвыспе. Хан пакуль не пацвердзіў, ці гатовы пераглядаць гэтае пагадненне, але пакінуў магчымасць для перамоў.

Пры гэтым сам Хан, які выконвае абавязкі пасля імпічменту Юн Сок Ёля, сутыкаецца з пытаннямі пра легітымнасць сваіх дзеянняў. Апазіцыя сцвярджае, што такі гандлёвы курс можа абмежаваць магчымасці наступнага абранага прэзідэнта.

2 красавіка Дональд Трамп, адзначаючы абвешчаны ім «дзень вызвалення Амерыкі», заявіў пра шырокамаштабнае ўвядзенне мыт на імпарт амаль з усяго свету. Гэта фактычна стала пачаткам новай гандлёвай вайны, якая закранула дзясяткі краін і рынкаў.

Найбольш жорсткія меры былі прыняты супраць Кітая — пасля некалькіх раўндаў узаемнага ўзняцця тарыфаў агульны ўзровень пошлін на кітайскія тавары дасягнуў 145%.

Абвяшчэнне новай палітыкі выклікала паніку на фінансавых рынках.

Праз некалькі дзён пасля хвалі крытыкі Трамп абвясціў пра 90-дзённую замарозку новага этапу мыт для больш за 75 краін, якія звярнуліся з просьбай пра дыялог і не сталі адказваць узаемнымі мерамі. Іх тавары часова абкладаюцца «базавымі» пошлінамі ў 10%, уведзенымі раней.

Некаторыя краіны ўжо распачалі перамовы. У прыватнасці, Японія вядзе актыўны дыялог з Вашынгтонам. 

• 0
• 0
• 0
• 0
• 0
• 0
• 0
• 0